دیتنەک بو ئازادیا ئابورى ل هەرێما کوردستانێ

2012-06-01

      

 خالد نورى دوسک

ئازادیا ئابوورى ئەڤرو بویە جهێ پوێتەپێدانەکا مەزن ل سەر ئاستێ جیهانێ وئێکە ژ گرنگترین پێڤەرێن ئابوورى یێن جیهانى بو پێشکەفتنا وەلاتان ژبەرکو  دهێتە هژمارتن رێکا سەرەکى یا گەشەپێدانا ئابوورى وخوشگوزەرانی وبەختەوەریێ دناڤ جڤاکى دا .سالانە رێزبەندیا وەلاتێن جیهانێ دهێتە کرن ل پەى پێڤەرێ ئازادیا ئابوورى کو پرانیا بوارێن ئابوورى وسیاسى وقانونى وکارگێرى ڤەدگریت ،ئەڤ رێزبەندیە ژلایێ پەیمانگەها هیرتاج فاوندیشن  وروژناما وال ستریت جورنال ڤە دهێتە وەشاندن بەلێ ژئەگەرێ بارێ عیراقێ یى نە ئارام ژلایێ سیاسى وئاسایشێ ڤە هەروەسا بەرەلاییا ئابوورى عیراقێ داتایێن پێدڤى ل بەردەست نەبوینە وعیراق نەکەفتیە دناڤا ڤێ راپورتێ دا .

ب دیتنا من گەلەک یا فەرە حکومەتا هەرێمێ ویا ناڤەندى ب زانستیانە سەرەدەریێ دگەل پێڤەر وراپورتێن نیڤ دەولەتى بکەن نەخاسم دبوارێ ئازادیا ئابوورى دا بو دیارکرنا کێماسى وشاشیێن ئابورى وچارەسەرکرنا وان وتاکو ببیتە رێکەکا دروست بو گەشەپێدانا ئابوورى .

ئازادیا ئابوورى لسەر لدویڤ چەندین فاکتەران دهێتە دەست نیشان کرن ودئابوورى مە دا دبیت گەلەک ژ ڤان فاکتەران هەبن بەلێ ل دوماهیێ هەر ئابوورى مە مایە لاواز دڤى بوارى دا ژئەگەرێ نەبونا پلان وبەرنامەیێن ئابوورى  یێن ستراتیژى ولاوازیا کەرتێ تایبەت وزال بونا کەرتى گشتى ل سەر هەمى کار وسازیان دناڤا ئابوورى نیشتمانى دا و ئەڤە ژى دبیتە ئەگەرێ زێدەبونا مەزاختیێن حکومەتى وبارێ حکومەتى گران دبیت د مەزاختنا بودجا گشتى دا ودەلیڤێن وەبەرهەهینانێ کێم دبن ول بەرامبەر ژى بودجەیا بە کاربرنێ (المیزانیە التشغیلیە ) زور بلند دبیت وئەڤ چەندە کارتێکرنێ لسەر بجهئینانا پروژێن وەبەرهینانى دکەتن ول دوماهیێ دەلیڤێن گەشەپێدانا ئابوورى کێم دکەتن.

پاشکەفتنا کەرتێ داریى وبانکى کو پتریا بانکان دحکومى نە وئەڤ بانکێن کەرتێ تایبەت یێن هەین ژى ژبەر کێمیا سەرمایێن وان نەشێن کارێن وەبەرهێنانێ بکەن وژلایەکێ دیڤە لاوازیا سیستەمێ باجى وگومرکێ ومایتێکرنا حکومەتێ دهەمى کارێن بازرگانى دا ناگونجیت دگەل ئازادیا ئابوورى وسیاسەتێن ئابوورى یێن جیهانى .

بەلاڤ بونا روتینێ وبیروکراتیەتێ دکارى دا ونە سەربەخویا قانونێ ودادوەریێ وگڤاشتنێن حکومەتى ودرەنگ دەرێخستنا فەرمانێن دادوەرى وهەروەسا نەبونا یاسا وپێرابونێن ساخلەم بو کارکرنێ ئەڤە هەمى رێگرن بەرامبەر کێرڤێ ئازادیا ئابوورى وپاراستنا بەکاربەرى وکارکەرى .

یا ئاشکەرایە کو پەیوەندیەکا راستەوخو هەیە دناڤبەرا ئازادیا ئابوورى وبلندبونا داهاتێ تاکە کەسى کو ل وان وەلاتێن ئازادیا ئابوورى پتر داهاتێ تاکە کەسى ژى یێ بلندە ئەڤجا یا فەرە حکومەتا هەرێما کوردستانێ وحکومەتا ناڤەندى پلانەک وستراتیژیەکا ئابوورى یا گشتى هەبیتن و وان هەمى یاسا وپێرابونێن پێدڤى دەربکەتن ل دور خورتکرنا رولێ کەرتێ تایبەت و وەبەرهێنانێ وکارکرنێ و تاکو ببیتە بنەمایەک بو گەشەپێدانا ئابوورى و ئازادیا ئابوورى .

 

بیروڕا

Bad Behavior has blocked 808 access attempts in the last 7 days.